Номлол

АНТИХРИСТИЙН ТАЛААРХ ДАНИЕЛЫН ЗӨН (Даниел 8-р бүлэг)

2010-06-20T05:52:00.001-07:00

2010 оны Даниел 8-р хичээл (06.20)

Зарлиг / Даниел 8-р бүлэг

Чухал зүйл / Даниел 8:17

“Тэгээд тэр миний зогсож байсан газарт дөхөж ирсэнд, би айж, нүүрээрээ газар унав. Тэр надад -Хүний хүү, энэ үзэгдэл төгсгөлийн цагт хамаарч байгаа гэдгийг ойлгогтун гэв.”

Даниел 8-р бүлэг бол нэг талаараа бараг 7-р бүлгийн давталт гэж хэлж болно. Даниел библийн зохиогч нь дэлхийн хаадыг ямар агуу хүчирхэг гэдгийг нь тайлбарлахын тулд дахин 7-р бүлэгтэй адил үйл явдлыг бичжээ. Дэлхийн хаадын хүч чадал үнэхээр агуу, хүчирхэг. Гэсэн хэдий ч хүчирхэг хаанчлал болон хаант улсыг ч сөнөөн сүйтгэж чадах өөр нэгэн далдын хүч бий. Энэ нь ялангуяа Бурханд итгэгчдийг сүйрэлд хүргэдэг. 8-р бүлэгт Сатаны хүч нь Бурханы эсрэг тэмцэн, ариун хүмүүсийг устгаж, Бурханы сүмийг нураах хүртлээ улам улам хүчтэй болсоор байгааг үзүүлжээ. Бид үүнийг Антихрист буюу Диаволын үүр, нууц явуулгад гарамгай нэгэн гэдэг. Гэхдээ Бурхан түүнийг устгаж чадна. Энэ зарлигаар бид дэлхийн хүчнүүд болон антихристийн нууцлаг хүчний талаар сурах болно.

Зарлигийн 1,2-р зүйлийг үзээрэй. Белшазар хааны ноёрхлын гурав дахь жилд, анхны үзэгдлээс хойш Даниелд дахин нэгэн үзэгдэл үзэгдэв. Түүний үзэгдэлд тэрээр өөрийгөө Елам аймгийн Суса цайзад Улаи голын эрэгт сууж байгаагаар харав. Өмнөх бүлэг дээр 4-н хаанчлалын талаар хэлсэн бол энэ хэсэгт 2,3 –р хаанчлалыг тодорхойлж өгч байна. Өөрөөр хэлбэл Бурхан Даниелд Вавилоны дараа аль аль улс захирахыг нэг бүрчлэн хэлж өгч байна.

3-р зүйлд гарч байгаа “Хоёр эвэртэй хуц” гэдэг нь 20-р зүйлд Меде болон Персийн хаанчлалыг зааж байна. 4-р зүйлд энэ хаанчлалын эзлэн түрэмгийлэл болон цаашдын хандлагийг хэлж өгсөн байна. “Харин тэрээр хүссэнээ хийж, өөрийгөө өргөмжлөв.”(4)

Дараа нь 5-7р зүйлд гарч байгаа “Ухна” бол 21,22-р зүйлд Грекийн хаанчлалыг төлөөлж байгаа бөгөөд нүднийх хоорондох том эвэр бол түүний анхны хаан агуу Александр юм. 8-р зүйлд энэ хаанчлал ямар байх талаар мөн хэлж өгчээ. “Тэгээд ухна өөрийгөө онцгой өргөмжилнө. Гэвч тэрээр хүчирхэг болмогц том эвэр нь хугаран унаж, оронд нь онцгой дөрвөн эвэр тэнгэрийн дөрвөн салхийг чиглэн ургав” (8) гэжээ.

4,8-р зүйлд дээр “Өөрийгөө өргөмжлөв” гэдэг үг олон дахин давтагдан гарч байна. Энэ 2 хаан өөрийн алдрын төлөө амьдарсан учраас төд удалгүй мөхсөн. Хүн ер нь өөрийн алдрын төлөө амьдрах үедээ мөхөж байдаг. Харин Христийн хаанчлал нь үүрд мөнхийнх билээ. Есүс өөрийн алдрын төлөө амьдраагүй. Үйлс, үйл хөдлөл бүрээрээ Бурхан Эзэнийг алдаршуулж байсан билээ. Тиймээ бид Бурханы алдрын төлөө амьдрах хэрэгтэй. Ялангуяа ололт амжилттай үедээ Эзэнд алдрыг өргөж, даруугаар амьдрах хэрэгтэй. Их хонь тэжээсэн ч гэсэн, баян болсон ч гэсэн, их мэдлэгтэй болсон ч гэсэн, сургуулиа амжилттай төгсөж, ажилд орсон ч гэсэн өөрөөрөө бахархах биш энэ бүгдийг зөвшөөрөн өгсөн Эзэн Бурханд алдрыг өргөн амьдрах нь хамгийн зөв юм. Яагаад гэвэл өөрийн алдрыг хайсан хүн нь эхэндээ сайхан байдаг боловч сүүлдээ цөхрөл, ганцаардал, уйтгар гунигт автдаг.

Агуу Александр хаан хэдийгээр хүчирхэг хаанчлалыг байгуулсан ч эзлэх улсгүй болсондоо уйлж байсан гэдэг. Түүнээс болж зугаа цэнгэл хөөцөлдөж амьдрах болсон байна. Ийнхүү Александр хаан хүндээр өвдөж 33-хан насандаа өөрийг нь ор залгах хүү төрүүлэлгүйгээр нас баржээ. Мэдээж тэр өвчнөөсөө болж нас барсан. Энэ үед түүний бүх эзлэн түрэмгийлэл нь дууссан, эзлэх улсгүй болчихсон байсан бөгөөд хийх ч юм байхгүй үлдсэн амьдралаа дэмий хоосон өнгөрөөж байжээ. Иймээс Сатан түүнийг гэтэж түүнийг үхэх хүртэл нь тамлан зовоосоор байжээ.

Бид яавал бардам байдлаа даруухан болгож чадах бэ? Энэ нь ЕсүсХристийг зүрх сэтгэлтэй “Аврагч”-аар хүлээн зөвшөөрөх үед л бид даруугаар амьдардаг. Өөрийн хүслийг үгүйсгэж Есүс миний Эзэн учир түүний хүслийг биелүүлэхэд анхаарлаа хандуулдаг. Эзэний хүслээр амьдардаг хүн нь хүсэл мөрөөдлөөр дүүрэн амьдардаг. Учир нь Эзэн Есүсийн “ Явж бүх үндэстнийг дагалдагч болгогтун” гэсэн зарлиг байдаг учир сайн мэдээний төлөө насан туршдаа амьдардаг. Нэг хонийг яаж дагалдагч болгох вэ? Энэ үндэстэнийг яаж Бурхан уруу эргүүлэх вэ? хэмээн хүсэл мөрөөдөлтэй амьдардаг. Нэг хүнийг аварсан бол дараагийн хүнийг гэх мэтчилэн насан турш хийх ажилтай байдаг билээ. Магадгүй настай болсон үедээ яг л Даниел шиг үзэгдэл үзэж, түүний төлөө хийж чадах бүхнээ хийж болох юм. Даниел шиг нэг үндэстний төлөө хичээнгүйлэн Эзэнд хандан залбирч болно. Тиймээ бидний амьдрал насан туршдаа Эзэний алдрын төлөө байх болтугай хэмээн залбирч байна.

Одоо зарлигийн 9-12-р зүйлүүдийг үзээрэй. “Тэдгээрийн доторх нэг эврээс нэгэн жижиг эвэр гарч, өмнө, дорно зүг ба Үзэсгэлэнт Орныг чиглэн онцгой том болов. ¹⁰Тэрээр тэнгэрийн цэрэгт хүрэхээр ургаж, цэргүүд хийгээд оддын заримыг газарт унагаж, уландаа гишгэв. ¹¹Тэрээр өөрийгөө тэнгэрийн цэргийн Жанжинтай адил болгохоор өргөмжилж, Түүнээс өдөр бүрийн тахилыг холдуулж, Түүний ариун газрыг сүйтгэв. ¹²Нүглээс болж тэнгэрийн цэргүүд өдөр бүрийн тахилын хамтаар эвэрт өргөгдөх болно. Эвэр үнэнийг газар хаяж, дураараа авирлан, амжилт олсоор байх болно.”

Энэ жижиг эвэр нь МЭӨ 168 онд Грекийн бурхан Зэвсийн хөргийг Иерусалимийн сүмд байрлуулж, тахилын ширээн дээр гахайг тахил болгон өргөсөн Антиохус Епифанесыг төлөөлдөг. Тэрээр Бурханы өргөөг бузарласан үйл ажиллагаагаа гурван жил хоёр сарын турш явуулжээ. 14 Зэвсийн хөргийг сүмд байрлуулж, тахилын ширээн дээр гахайг тахил болгон өргөсөн нь цэвэр Эзэний хууль , Эзэн Бурханыг хамгийн ихээр эсэргүүцэн явдал юм. Израйлчууд хэзээ ч гахайн махыг тахилд өргөдөггүй байсан. Хуульд ч тийм зүйл байхгүй. Антиохус Епифанесын энэ үйлдэл нь өнөөдөр Антихристүүдийг заадаг. Зэвсийн хөргийг сүмд байрлуулах буюу өөрийнхөө үзэл бодлыг төвд тавьж амьдрах, тахилын ширээн дээр гахайг тахих буюу сүмд дэлхийн хоосон яриа, эмгэдийн үлгэрүүдийг ярьдаг хүнийг хэлж байна. Өөрийнхөө үзэл бодлыг төвд тавьж амьдрах нь хамгийн ноцтой зүйл. Бурханаас илүү аав, ээж, найз нөхдийнхөө бодлоор асуудлыг шийдэх нь өөрийгөө төвд тавьсан хүний шинж. Бурханы хүсэл , зорилго зөвлөгөө нь үргэлж үнэн байж, амийн замаар хөтлөн дагуулдаг.

Антихристүүд юу хийх вэ? 23-24-р зүйлүүдэд “Эдгээрийн ноёрхлын төгсгөл үед нүгэлтнүүд илүү харгис болох үед,ичгүүргүй, нууц явуулгад гарамгай нэгэн хаан гарч ирнэ. ²⁴Тэр өөрийнхөө хүчээр бус, агуу хүчтэй болно. Тэр асар их хэмжээгээр эвдэж, амжилт олон дураараа дургих болно. Тэрээр хүчтэнүүдийг болон ариун хүмүүсийг сөнөөнө.” Мөн биднийг хамгийн ихээр хууран мэхлэх болно. 25-р зүйлийг үзээрэй. “Тэрээр хэрсүү ухаанаараа хууран эхлэлтийг хөгжүүлэхэд нөлөөлнө. Тэрээр зүрх сэтгэлдээ бардамнаж, Амар тайван байхад нь олон хүнийг сүйтгэх болно.” Энэ талаар Паул “Хэн ч та нарыг ямар ч аргаар бүү мэхлэг. Учир нь эхлээд итгэлээс салах явдал гарч, сүйрлийн хөвгүүн болох ёс бусын хүн илчлэгдэхээс нааш тэр өдөр ирэхгүй” гэжээ.

Биднийг хууран мэхэлж жаахан амжилт олох үед “Би бол хамгийн агуу нь” гэж бодоход хүргэдэг. Тиймээс хэнд ч гэсэн Антихристийн заль мэхэнд унах нь амархан байдаг. Антихристууд бол ямар ч үүрэг зорилгогүй амьдардаг хүмүүс юм. Бид тэднийг харахад тэд төгс, ямар ч асуудалгүй мэт харагддаг. Санаа зовох зүйлгүй. Тэгээд бид өөрсдийгөө “ Би юу хийгээд байна? Би яагаад ингэж ариун гэгээн, зөв шударга амьдрах ёстой гэж?” хэмээн өөрсдөөсөө асуудаг. Ийм асуулт нь биднийг ямар нэг зүйлийн цаад утгыг биш харин өнгөц, гаднах байдлыг нь харахад гарч ирдэг. Гэвч тэдний доторх хүнийг харах сүнсний хараатай болоход тэд юу ч биш харин амиа хорлогч, мансуурагчид гэдгийг харах болно. Учир нь тэд Антихристүүдийн зовлон зүдгүүр дор амьдардаг (Дуулал 73:1-17). Бурхан уруу очин библи судлахад бид тэдний эцсийн хувь тавиланг нь олж харна. Бурхангүй амьдардаг тэдгээр хүмүүс нь Сатаны зовлон зүдгүүр, гэмийн ачаанд дарагдан амьдардаг. Тэд эцэстээ заавал Бурханы шүүлттэй нүүр тулгарах болно.

1 Петр 5:8-д “Эрүүл ухаантай, сонор сэрэмжтэй бай. Та нарын өрсөлдөгч болох диавол нь хэн нэгнийг залгихаар хайж буй архирах арслан мэт гэтэн явдаг.” Сатан биднийг үргэлж унагахын төлөө ямар нэгэн аргаар бидэнд эргэлзээ тээнэгэлзээг бий болгож итгэлийн амьдралаас маань холдуулахыг цаг ямагт оролдсоор байх болно. Яг дээрхийн жишээ шиг бардам болгох, өөрийгөө бусадтай хариуцуулж голох зэрэг явдлуудыг хийсээр байх юм. Бид үүнийг хараад шантрах хэрэггүй билээ.

Одоо зарлигийн чухал зүйлийг үзээрэй.17-р зүйлд “Тэгээд тэр миний зогсож байсан газарт дөхөж ирсэнд, би айж, нүүрээрээ газар унав. Тэр надад -Хүний хүү, энэ үзэгдэл төгсгөлийн цагт хамаарч байгаа гэдгийг ойлгогтун гэв.” Габриел Даниелд энэ үзэгдлийг харуулсан нь түүнийг сэрэмжтэй амьдрахыг сануулсан юм. Өнөөдөр ч гэсэн биднийг ийнхүү сануулж байна. Учир нь төгсгөлийн цаг одоо ирчихээд байгаа билээ. Бид энэ итгэлээс салах, антихристүүдийн гар хөл болохгүйн тулд өдөр бүр өөрийгөө хянаж байх хэрэгтэй. Библийн үгэнд анхаарлаа нарийн хандуулж , мөн залбирлаар энэ бүгдийг даван дийлэх билээ. Даниелийн итгэлийн шийдвэр мөн Бурханыхаа өмнө өдөрт 3-н удаа талархал өргөн залбирч байсан түүнд Бурхан ирээдүйд юу болох талаар хэлсэн байна. Өнөөдөр бидний энэхүү Эзэнд гаргаж байгаа золиослол бүрээр бидний залбирал бүрээр Эзэн ажлаа хийдэг. Сүнслэг цаг бүрээр дамжуулан сануулж, сэрэмжлүүлж, урам зориг, Өөрийнхөө удирдлагыг мэдүүлж байдаг.

Манай цуглааны үйл ажиллагаа өдөр бүр нээлттэй байдаг нь энэ Эзэний сүмд ирж сүнслэг цагаар Эзэнтэй уулзаж, залбирч авралаа баталгаажуулахын тулд байдаг. Бурханы үгэнд анхаарлаа нарийн, нягтлан хандуулсанаар Антихристүүдийн заль мэхэнд бид автахгүй байж чадах билээ. Хэдийгээр нөхцөл байдал антихристүүдийн талд байгаа юм шиг харагдавч Эзэний амласан “Тэгээд бүхэл тэнгэрийн доорх хамаг хаанчлалын дээд засаг, эрх мэдэл болон агуу байдал нь Дээдийн Дээд Нэгэний ариун хүмүүсийн ард түмэнд өгөгдөх болно. Түүний хаанчлал нь үүрдийн хаанчлал байх бөгөөд бүх эрх мэдлүүд Түүнд үйлчилж, захирагдан дагах болно" (Дан 7:27) гэсэн зарлигт бат итгэн амьдрах болно.

Зарлигаас сурсан миний хамгийн чухал зүйл бол энэ хөлбөмбөгийн дэлхий аврага шалгаруулах тэмцээн эхэлсэнтэй холбоотойгоор сүнсний назгай байдалт автах нь их амархан юм шиг санагдлаа. Бурханы үгэнд анхаарлаа хандуулахаас илүү тэмцээн анхаарлаа их хандуулж байгаа нь миний хичнээн сул дорой байгааг харлаа. Антихристийн гар хөл болох боломжтой болсон байгаагаа харлаа. Зарлигаар дамжуулан энэ бүгдийг сануулж өгсөн Эзэнд талархаж байна. Энэ цаг үед үргэлж сүнсээр сэрэмжтэй амьдрахын төлөө залбиран гуйж байна.

Дүгнэж хэлэхэд өнөөдөр ч гэсэн бидний итгэлийн амьдралд саад болох АнтиХристүүд байгааг бид хүлээн зөвшөөрөх хэрэгтэй. Хүн бүрийн хамгийн том дайсан бол гадна талаас харахад хавчиж байгаа та бидний хайртай ах дүү, хамаатан садан хүмүүс бус, харин антихрист буюу биднийг Бурхан уруу ирэхэд саад болдог нүдэнд үл харагдагч сатан юм. Тиймээс бид гэмшил, талархал, гуйлтаараа Эзэн Бурхан уруу өдөр бүр очиж байх хэрэгтэй. Хүндэтгэлийн ариун өдөр ч гэсэн Эзэний өмнө байгаагаараа үнэн төрхөөрөө очих хэрэгтэй. Гэмших зүйл байвал чин сэтгэлээрээ гэмшиж, талархах сэтгэлээр дүүрэн байх хэрэгтэй. Эзэн бидэнтэй үргэлж хамт байх болно. Амен

ХҮНИЙ ХҮҮ (Даниел 7 бүлэг )

2010-06-15T09:17:00.003-07:00

2010 оны Даниел 7-р хичээл (06.13)

Зарлиг / Даниел 7 бүлэг

Чухал зүйл / Даниел 7:13

Би шөнийн үзэгдлийг харсаар байсан бөгөөд, харагтун, Хүний Хүү шиг Нэгэн тэнгэрийн үүлсийг хөлөглөн ирж, Тэрээр Эртний Нэгэнд очоод, Түүнд бараалхав.

Сайн байцгаана уу? Даниел эхний 6 бүлгийг үзэхэд үнэхээр ойлгомжтой, сургамж авахаар, сэтгэл хөдөлгөсөн, зарим хэсэгт өөрийгөө хараад ичмээр, гэмшимээр үйл явдлуудаар дүүрэн байлаа. Бурхан Өөрт нь итгэж найддаг хүмүүсээ хэрхэн гайхамшигтайгаар аварч, энэрч, тусалж байгаа талаар ч сурсан. Мөн Вавилоны хаадуудын элдэв зүүдүүдийг элдэв шидтэн, мэргэд нь огтоос тайлж, хэлж чадахгүй байхад Даниел Бурханаас илчлэлт аван гайхамшигтайгаар, маш тодорхой тайлбарлаж, цаашид хэрхэх талаар нь хаадуудад зөвлөж байсан. Үүн шиг та нар ч гэсэн эхний 6 бүлгээс их зүйлийг сурч, бас ухаарал, гэмшил, талархал, магтаалаар дүүрэн байсан гэдэгт итгэж байна.

Харин өнөөдрийн 7 бүлэгээс 12-р бүлэг хүртэл үнэхээр гайхмаар хачин зүүдүүд үргэлжлэх болно. Үүнийг бид уншаад ерөөсөө энэ хэсгийг орхиод, өөр библи үзье гэж бодогдож магадгүй. Юун баахан амьтан, салхи, далай гэх мэт биологи, газар зүйн хичээл шиг юм бэ? Эсвэл энэ дэлхийд байхгүй хачин жигтэй амьтад вэ? Энэ ямар Аватор уран сайхны кино юмуу? Үүний оронд илүү чухал зүйл болох Бурханыг бүх зүрх сэтгэлээрээ, Хөршөө өөрийн бие мэт хайрлах агуу тушаалуудыг сурвал дээр мэт санагдаж магадгүй. Таньд тийм бодол төрж байна уу?

Гэхдээ бид библид чухал бус, нэг их ач холбогдолгүй, зүгээр л нэг гүйлгээд харахад болно гэсэн хэсэг нэгээхэн ч байхгүй гэдгийг санах хэрэгтэй. Сургаалт үгс 30:5–д “Бурханы үг бүр соригдсон. Тэрээр Өөрийнх нь дотор хоргодогсдод бамбай юм.” Мөн Илчлэлт 22:18-19-д “Хэрэв хэн нэгэн нь эдгээрийн дээр нэмэх аваас, Бурхан энэхүү номд бичигдсэн гамшгуудыг түүнд нэмэх болно. Хэрэв хэн нэгэн нь энэхүү эш үзүүллэгийн номын үгсээс хасах аваас Бурхан энэхүү номд бичигдсэн амийн модноос болон ариун хотоос хувийг нь хасах болно.” гэсэн. Тиймээ, Бурханы үг бүр соригдсон. Үе үеийн хүмүүс Бурханы үгэнд хайхрамжгүй хандсанаас болж үхэл, амьдралын асуудлаа гаргуунд нь гаргаж байсан. Тиймээс Бурханы үг бүрийг нягтлан үзэх нь үнэхээр чухал юм. Мэдээж бид үүнийг ойлгохгүй байна гэдэг өөр асуудал юм. Библи хүн бүр уншаад л ойлгогддог ном биш. Харин Ариун Сүнсний тусламжтайгаар уншиснаар бидний сүнсний хараа нээгдэн ухаардаг ном юм. Энэ цагт Ариун Сүнс эхнээс, дуустал хамт байж бидний харааг нээж, чихийг онгойлгож өгөхийг гуйж байна.

Бүгдээрээ 13 дугаар зүйл хамт үзье. “Би шөнийн үзэгдлийг харсаар байсан бөгөөд, Харагтун, Хүний Хүү шиг Нэгэн тэнгэрийн үүлсийг хөлөглөн ирж, Тэрээр Эртний Нэгэнд очоод, Түүнд бараалхав.”

Вавилоны хаан Белшазарын нэг дэх жилд Даниел нэгэн зүүд зүүдэлсэн. Түүнийг харж байхад тэнгэрийн дөрвөн салхи их далайг оволзуулж байтал өөр хоорондоо адилгүй дөрвөн аварга араатан далайгаас гарч ирсэн. Библид их далайг хүн төрлөхтөн болон хаанчлалуудыг, салхиар Эзэний Ариун Сүнс хийгээд тэнгэр элч болон хүч чадлыг илэрхийлдэг. Мөн айдас төрүүлэм дөрвөн араатан нь газраас босох дөрвөн хааныг илэрхийлсэн байна. (17)

Даниелын энэ зүүд нь ирээдүйд болох үйл явдлыг эцэс хүртэл нь үзүүлсэн. Түүний зүүд том хаанчлалууд, гүрнүүд босгон байгуулагдах боловч эцэстээ бүгд нуран унах болно. Харин Хүний Хүү л үүрд мөнхөд хаанчлах болно гэдгийг гэрчилсэн.

Хүмүүс ер нь ирээдүйн талаар мэдэх их сонирхолтой байдаг. Тийм болохоор янз бүрийн мэргэ, төлөгч нар уруу хошуурч хамаг байдгаа бардаг. Хэрвээ хүн ирээдүйн талаар зүүдэлдэг бол яах байсан болоо? Нэг шөнө зүүдлээд л махны үнийн талаархи энэ 21 дүгээр зууны бүх мэдээллийг өдөр бүр, үнэ ханштай нь мэдвэл яах вэ? Тэгвэл би Монгол болоод Дэлхий дэх хамгийн том махны магнат болох нь гарцаагүй. Одоо Дэлхийн аварга шалгаруулах хөл бөмбөгийн тэмцээн эхэлсэн. Энэ тэмцээний бүх оноолт, хожигдол, хожлыг улс улсаар нь мэдэж байвал тэгээд л том том бооцоот тааварт ороход тэгээд л бөөн мөнгө хийх боломж гарч ирнэ.

Гэхдээ Даниелын зүүдний зорилго нь энэ мэт хүмүүс бидний махбодийн шунал, хүслийг хангахад чиглээгүй юм. Харин хүн төрлөхтний түүхэн дэх Бурханы төлөвлөгөө, зорилгыг хүмүүст мэдүүлж, Хүний Хүүд итгэснээр тэнгэрийн улсад хамтдаа хаанчлахын тулд юм.

Одоо бүгдээрээ зарлигийн үгэнд анхаарлаа хандуулья. Даниелын зүүдэнд гарсан дөрвөн айдас төрүүлм араатнууд юуг илэрхийлж байгаа вэ? Одоо бүгдээрээ 17 дугаар зүйлийг хамт үзье. “Энэ дөрвөн аварга араатан бол газраас босох дөрвөн хаан юм.”

Даниелын зүүдэнд гарсан эдгээр дөрвөн араатан нь Даниел 2 дугаар бүлэгт гарсан Небу хааны алт, мөнгө, хүрэл, төмрөөр хийсэн хөшөөтэй адил утгатай байсан. Эдгээр араатны зан чанартай төстэй хаанчлалууд ээлж дараалан гарч ирсэнийг бид түүхээс мэдэж болно. Одоо бүгдээрээ Даниелын зүүдэн дэх араатан бүрийн утгыг товчхон үзье.

Дөрөвдүгээр зүйлд гарч байгаа “Арслан шиг бөгөөд бүргэдийн жигүүртэй амьтнаар” Небу хаан болон Вавилон гүрнийг илэрхийлжээ. Бид араатны хаан арслан гэдгийг бүгд мэднэ. Бас Жигүүртний хаан бүргэд гэдгийг ч мэднэ. Бүргэд шиг өндөрт дүүлж, бүргэд шиг холыг хардаг шувуу хаана байна вэ? Хурд, хүчний гайхамшгийг үзүүлсэн Небу хаан МЭӨ 605 онд бүх дэлхийг хаанчлах болсон. Тухайн үедээ үнэхээр бүх дэлхийг Небу хаан ноёлж, алтан хөрөг бүтээгээд Даниелын гурван найзаас бусад бүх хүнийг өвдөг сөгдүүлж чадсан хүчирхэг хаан байсан. Тэр бүргэдийн жигүүртэй арслан мэт амьдралаар 43 жилийн турш хаанчилсан. Архелогийн олдвороор Вавилон гүрний бэлэг тэмдэг нь бүргэдийн далавчтай арслан болох нь нотлогдсон байдаг. Гэхдээ энэ хүчирхэг гүрэн нэг л өдөр Меде Персийн дайралтаар сүр хүчээ алдаж, нуран унасан. Үнэндээ бүх л хаанчлал тухайн цаг үедээ агуу байдаг боловч нэг өдөр л нуран унадаг. Бид бол агуу түүхтэй ард түмэн. Үнэндээ энэ дэлхийд олон улс гүрэн, үндэстэн байгаа. Гэхдээ эдгээр улсууд дундаас хамгийн том газар нутгийг эзэлж, хамгийн эзэнт гүрнийг байгуулсан улс орон биднээс өөр байхгүй. Ромын эзэнт гүрэн шиг урт удаан хаанчилсан гүрэн одоогоор бас алга байна. Гэхдээ өнөөдөр эдгээр хамгийн гэсэн тодотголтой улс гүрэн одоог хүртэл тэр хэвээрээ байгаа нь нэгээхэн ч алга. Үнэндээ энэ дэлхийн хаанчлалуудын хувь тавилан бүгд ижил юм. Тэд яг л хээрийн цэцэг мэт бөгөөд нэг л өдөр хагдран унадаг. Энэ талаар Исаиа 40:6-д “Бүх махан бие нь өвс бөгөөд түүний бүх сүр жавхлан нь талын цэцэг мэт юм.” хэмээн маш тодорхой хэлсэн.

Тэгвэл гурван хавирга зуусан, хажуулдан босож байгаа баавгай нь аль хаанчлалыг төлөөлж байна вэ? Хэрвээ хэн нэг нь таныг баавгай шиг гэвэл юуг илэрхийлэх вэ? Баавгай бол нэг тийм махлаг, бүдүүн, энгийн, бас удаан хөдөлгөөн боловч маш их хүчтэй. Бүгдийг хүчээр дайрч шийддэг. Энэ бол МЭӨ 530-330 оны хооронд 200-д жил хаанчилсан Меде Персийн хаанчлалыг төлөөлсөн. Энэ улсын нэг онцлог нь бусад улс оронтой дайтахдаа байлдааны тактик огт хэрэглэдгүй байсан. Тэд зүгээр л маш их цэргийн хүчээр дайран орж дайснаа буулгадаг. Тэдний тактикийг түүхчид “Хүн далай” гэж нэрлэсэн байдаг. Тэд яг л бульдозер, эсвэл хадлангийн комбайн мэт дайрч, хадаж, дайснаа олзлон хураадаг байсан.

Гурав дахь араатан нь дөрвөн далавч, дөрвөн толгойтой ирвэс байсан. Эдгээр амьтдын тэмдэг нь хурдыг илэрхийлдэг. Энэ бол агуу Александр хааны байгуулсан Грекийн эзэнт гүрнийг төлөөлсөн. Александр хаан маш хурдтай хөдлөх үед түүний генералууд арай удаанаар хийхийг ятгадаг байсан. Үнэндээ Александр хаан маш их хувийн амбицтай хүн байсан бөгөөд Аристотел түүний хувийн багш нь байжээ. Тэрээр Македониос эхлээд Хойд Африк, цаашлаад Энэтхэгийн нэг хэсгийг хүртэл эзэлсэн. Тэр ялалт байгуулж дуусаад “Надад байлдан дагуулах өөр улс орон үлдсэнгүй” хэмээн уйлан хашгирч байсан гэдэг. Яг л манай Чингис хаан шиг “Үүнээс цааш газар үгүй” гэсэнтэй адил юм. Түүний хаанчлал түүхэнд яг л хүчит шуурга мэт маш хурдан, хүчтэй өнгөрөн одсон. Тэр МЭӨ 330-323 оны хооронд ердөө 8-хан жил хаанчилсан бөгөөд 33-хан насандаа хумхай өвчнөөр нас баржээ.

Түүний дараа гарч ирэх дөрвөн толгой нь түүнийг үхэхэд эзэнт гүрнээс нь гарч ирсэн хаант улсууд юм. Агуу Александр хаан залуугаараа өнгөрсөн тул удам залгах хүүгүй байсан. Тиймээс түүний 4 генерал тус тусдаа салан тусгаарласан. Лусимакус Трас болон Битиниаг, Кассандер Грек болон Македониг, Селеүкүс Вавилон болон Сирийг, Птоломей Палестин, Египет, Арабыг авч салсан.

Дөрөв дэх араатан нь том төмөр шүдтэй, тэр гэхийн тэмдэггүй, магадгүй бүх л аймшигтай гэж хэлж болох араатнуудын цуглуулга мэт байсан. Мөн энэ араатанд 10 эвэр байсан. Эвэр бол хүч чадлын билэгдэл. Тэгвэл 10 эвэр гэдэг бол үнэхээр их хүч чадлыг илэрхийлж байгаа. Энэ эзэнт гүрэн анх МЭӨ 241 оны орчим Сицилд бүрэлдэн буй болж, улмаар Испани, Македони, Грек, Азийн баруун хэсгийг эрхшээлдээ оруулсан. Тэгээд МЭӨ 10 онд Иерусалимыг эзэлж, үүнээс хойшхи 10-хан жилийн дотор Англи, Франц, Белги, Германыг гартаа оруулсан. Ингээд МЭ 17 он гэхэд Европыг тэр чигээр нь, цаашлаад Энэтхэг улсыг эзэлж агуу Ром улс бүрэлдэн буй болсон.

Ром улс өөрөө харгислал, ёс бус зүйлсийн билэг тэмдэг болсон улс болсон. Тэд эзлэн авсан улс орныхоо оршин суугчдыг хайр найргүй хомроглон устгаж, аль хүчтэй, чадалтай гэсэн хүмүүсийг сонгон авч өөрийн дайн тулаанд ашигладаг байсан. Тэд өөрсдийнх нь эсрэг зогссон хэнийг ч болов үр үндсээр нь өршөөл энэрэлгүй хүйс тэмтэрч, харгис хэрцгийгээр хүний санаанд орохооргүй зүйлсийг үйлдэж байсан. Тэд боолуудыг хооронд нь тулалдуулж, бие биесээ харгис хэрцгийгээр устгахыг хараад тайшаал авдаг байсан. Бид үүнийг Галидатор киноноос олонтаа харсан. Мөн арслангуудад хүмүүсийг хаяж өгөх, хүний биеийг яз уран амийг нь авч явдаг ташуур, загалмайд хүнийг цовдлох энэ бүгд нь Ромын эзэнт гүрний харгислалын нэгээхэн хэсэг байсан. Тэдний харгислалын нэг том жишээ нь ямар ч гэмгүй Есүс Христийг загалмайд цовдолсон явдал юм. Мөн цаашлаад 1-р зууны Христэд итгэгчдийг хамгийн харгис хэрцгийгээр алж, амьдаар нь хөрөөдөж, амьтны идэш болгож, тарчлааж, хавчиж байсан гүрэн бол Ром юм.

Энэ дөрвөн араатны дараа бас нэг сонин, жижигхэн эвэр гарч ирсэн. Одоо бүгдээрээ 8-р зүйлийг үзье. “Би тэдгээр эврүүдийг ажиглаж байтал тэдний дундаас өөр нэгэн жижиг эвэр ургаж, түрүүчийн эврүүдээс гурав нь түүний өмнө үндсээрээ булгарав. Харагтун, энэ жижиг эвэр хүний нүд шиг нүдтэй бөгөөд ихээр бардамнан ярих амтай болов.”

Энэ жижигхэн эвэр нөгөө дөрөв дэх араатны хүч чадлын билэгдэл болсон 10 эврийн 3-г нь үндсээр нь булгалсан. Бидний ярьдаг шиг бие жижиг ч бэлчээр томтой, маш эвгүй эвэр гарч ирсэн. Түүний нүд нь хүнийх шиг бөгөөд маш ихээр бардамнан чалчигч байсан. Библи ийм зүйлсийг яригч нь Антихрист буюу Сатаны хаанчлалыг заадаг. Энэ Антихрист нь зөвхөн хүн төрөлхтнийг устгаад зогсохгүй Бурханыг хүртэл эсэргүүцэн тэмцэлддэг. Одоо бүгдээрээ 25 дугаар зүйлийг үзье. “Тэрээр Хамгийн Дээд Нэгэний эсрэг ярьж, Дээдийн Дээд Нэгэний ариун хүмүүсийг дийлэх болно. Тэрээр цаг үе болон хуульд өөрчлөлт оруулахыг оролдох болно.”

Антихристүүд нь Есүсийн дүр төрхийг хуурамчаар дуурайж, Түүний хэмжээлшгүй эрх мэдлийг үгүйсгэж, хүмүүсийг өөртөө татан Бурханаас холдуулахад оршдог. Бас тэд энэ дэлхийн хүн төрлөхтний ололт, амжилтыг ашиглан хүмүүсийг бардам, ихэмсэг, хүйтэн хөндий болгож сүйтгэхэд анхаардаг.

Тэгвэл өнөөдөр эдгээр Антихристүүд байна уу? Одоо бүгдээрээ 1Иохан 2:18 үзье. “Нялхас аа, энэ бол эцсийн цаг. Христийг эсэргүүцэгч нь ирж байна гэж та нар сонссончлон, одоо ч гэсэн Христийг эсэргүүцэгчид олноороо гарч ирж байна. Энэ нь эцсийн цаг гэдгийг бид үүнээс мэднэ”

Өнөөдөр ч Антихристүүд хаа сайгүй байна. Мэдээж тэд өнөөдөр та бидэн рүү ямар нэг эвэртэйгээр, эсвэл тамын хар хувцас, сэрээ бариад ирэхгүй нь ойлгомжтой. Харин тэд хонины арьс нөмөрч бидний дунд орж ирэх болно. Гэхдээ бид энэ бүгдийг сонсоод айж, эмээх хэрэггүй. Харин Ариун Сүнсэнд түшиглэн гуйвал Эзэн бидэнд хонины арьсанд байх чоныг илэрхий болгож, бас хамгаалж өгнө.

Энэ цаг үед бид Бурханы үг болсон библийг маш тодорхойгоор, няхуур судалж, хоньддоо зааж, сургавал тэд эдгээр хонины арьс нөмөрсөн чононуудын идэш болохгүй. Гэхдээ харамсалтай нь өнөө цагт эдгээр антихристүүд мөнгөөр, шинжлэх ухааны ололт амжилтаар, технологийн дэвшилээр Бурханы байх ёстой орон зайг эзлэн хүмүүсийг төөрөлдүүлж байна. Тэр байтугай зарим сүм чуулган ижил хүйстэнтэй явалдах явдлыг хүлээн зөвшөөрч, хоорондоо ёс бусаар эр эм болох байдал газар авч байна.

Энд гарч байгаа ихээр бардамнан яригч эврийн үүргийг манай чуулганы зарим итгэгчид түүнээс ч дутахгүй гүйцэтгэж байна. Хүний ёсонд ч байдаг энгийн ах захаа хүндлэх ёсыг умартан бусдыг буруутгаж, том ам, том зан гаргадаг жижигхэн эврүүд олон болсон байна. Бурханы ивээлээр хэдэн бор төгрөг бусдаас илүү олсоныгоо өөрийгөө бүхнээс ухаантай, бусдаас илүү нэр хүндтэй хэмээн мунхаглан сэтгэж, хил хязгааргүй хошуу ам нь цорволзож, бусдыг зандарч, загинадаг болжээ. Библи болоод энгийн хүний ёсонд ч эрдэмтэй хүн даруу, их мөрөн дөлгөөн байдаг. Харин ийм зүйл сүм чуулганд эсрэгээр харагдах болсон нь бидний түгшивэл зохих, гэмшвэл зохих, залбирвал зохих асуудал болжээ.

Сүүлийн үед библийн үг бидний амьдралд зүгээр нэг гүн ухааны сургааль, мэдлэг төдий зүйл болж байгаа мэт сэтгэгдэл төрөх болсон. Библийн үгээр амьдарч, тэмцэж, хичээж буй хүмүүс нь адгийн тэнэг, арчаагүй амьтад болж, амин хувиа хичээсэн, ашиг хонжоо хайгчид нь ардын баатар мэт харагдах болжээ. Энэ бүгд л адгийн муу ёрын сүнсийг баярлуулдаг бөгөөд цаг үе хийгээд хуульд өөрчлөлт оруулах гэж оролдох бус, харин өөрчлөлт оруулж эхэлсэн болохыг анхааруулан сануулж байгаа юм.

Даниел библи бидэнд түүхийг өгүүлдэг. Бурхан түүхэнд гарцаагүй хийх ёстой зүйлээ хийнэ гэсэн бол гарцаагүй л түүнийгээ хийдэг. Небу хааныг алтан толгой болно, тэгээд дараа нь мөхөх болно хэмээн гэрчилсэн. Гэхдээ хэрвээ чин сэтгэлээр гэмшвэл энэ бүгдийг гүйцэлдүүлэхгүй байж болно хэмээн анхааруулсан. Гэхдээ Небу хаан зөрүүдлэж, эзэргүүцэж, өөрөө бүх үеийн хаанаар мөнхөд үлдэхийг хүссэн. Тэгээд зүүдэнд нь үзэгдсэн алтан толгой, мөнгөн цээж, хүрэл хэвлий, төмөр хөлтэй хөшөөг тэр чигээр нь алтаар бүрж, тухайн үеийн бүх эхэс дээдсийг мөргүүлсэн. Тэглээ гээд Бурхан түүнийг зүгээр өнгөрөөгөөгүй. Харин Даниелын зүүдэлсэн зүүд түүхэнд зөгнөлийнхөө дагуу л болж өнгөрсөн.

Ийм зүйлийн талаар Дуулал 52:1-5-р зүйлд “Хүчирхэг хүн ээ, чи яагаад бузар муугаар бахархдаг вэ? Бурханы хайр энэрэл бүхэл өдөржин тэсвэрлэдэг. Худал хуурмагийн ажилчин аа, чиний хэл Хурц тонгорог мэт сүйрлийг сэддэг. Чи сайнаас илүүгээр бузар мууг хайрладаг. Үнэнийг ярихаасаа илүүгээр худлыг хайрладаг. Зальт хэл ээ, Чи хөнөөлт үг бүрийг хайрладаг. Харин Бурхан чамайг үүрд сөнөөнө. Тэрээр чамайг авч хаян майхнаас чинь гаргаж, Амьдын газраас чамайг үндсээр чинь суга татан хаяна.” гэсэн байдаг.

Өнөөдөр ч гэсэн Бурхан биднийг гэмт амьдралаасаа эргэн, гэмшихийг, Бурханы үгийг байгаа чигээр нь хүлээн авахыг, бас тунхаглахыг анхааруулж байна. Хэрвээ бид үүний дагуу хийхгүй, адгийн муу ёрын сүнс буюу антихристүүдийн гар хөл болж эхэлбэл Эзэн тэнгэрийн дөрвөн салхиар дамжуулан хийх гэснээ бүрэн хийх болно гэдгийг түүх бидэнд гэрчилж байна.

Даниел энэ бүх үйл явдлыг хараад үнэхээр их шаналж, түгшин айж байсан. Гэхдээ ийм байдал дунд Бурхан түүнд тайвшралыг өгчээ. 9 дүгээр зүйлээс эхлээд Бурхан түүнд бүх үнэнийг үргэлжлүүлэн илэрхийлж эхэлсэн. Хэдий ийм харгис хэрцгий хаанчлалууд, антихристүүд байгаа ч гэсэн Эзэн тэднээс илүү хүчтэй бөгөөд үүрд мөнхийн гэдгээ илэрхийлсэн.

Хамгийн эхлээд тэнгэр элч түүнд хаан ширээнд заларч буй Эртний Нэгэн болох Бурханыг харуулсан. Одоо бүгдээрээ 9,10 дугаар зүйл үзье. “Намайг харсаар байтал сэнтийнүүд тавигдаж, Эртний Нэгэн Өөрийн суудалд залрав. Түүний хувцас цас шиг цагаан, Түүний толгойн үс нь цэвэр ноос шиг байв. Түүний сэнтий галын дөл шиг, дугуйнууд нь дүрэлзсэн гал шиг байв. Түүний өмнөөс галтай мөрөн гарч ирэн урсав. Үй түмээрээ Түүнд үйлчилж, Үй түмээрээ Түүний өмнө зогсоцгоож байлаа. Шүүлт эхлэн, номууд дэлгэгдэв.”

Энд гарч байгаа дүрслэлүүд нь ариун байдлын цагаан өнгө, сүр хүчний билэгдэл болсон цэвэр ноос шиг толгойн үс, шударга шүүлтийн гал дөл бүгд илэрхийлэгдсэн. Тэгээд шүүлт эхлэн номууд дэлгэгдсэн. Та нар энэ номыг ямар учиртай ном гэж бодож байна вэ? Илчлэлт 21:27 “Ямар ч бузар юм болон жигшүүрт зүйл үйлддэг болон худал ярьдаг хэн ч хэзээ ч тийшээ орохгүй. Харин зөвхөн Хурганы амийн номд нэрс нь бичигдсэн хүмүүс л орох ажгуу.” гэсэн байна.

Эцсийн тэр өдөр шүүлт эхлэн номууд дэлгэгдэх нь зайлшгүй юм. Гэхдээ энэ шүүлтээр хүн бүлгээрээ юмуу, цуглаанаараа, эсвэл найз нөхдөөрөө, гэр бүлээрээ орохгүй. Харин ганц ганцаараа орох болно. Тэгээд бид бүх амьдралаа нэгд нэгэнгүй Түүнд тайлагнах болно.

Шүүх хурал ямар байдалтай болох болоо? Тэнгэрийн улсын шүүгч биднээс хамгийн эхлээд “Таны нэр хэн бэ?” гэж асууна. “Миний нэрийг Болдбаатар гэдэг” хэмээн хариулна. Хэсэг хугацааны дараа “Таны нэр амийн номноос олдлоо баяр хүргэе. Та манай тэнгэрийн улсад тавтай морилно уу?” гэж хэлэх болно.

Харин өөр нэг хүн шүүлтийн өмнө ирнэ. “Таны нэр хэн бэ?” гэхэд “Миний нэрийг Белшазар гэдэг. Магадгүй наад номонд чинь Алтан толгой ч юмуу эсвэл Бүргэдийн жигүүртэй арслангын удам” гэсэн нэрээ байж магадгүй сайн үзээрэй” гэнэ. Тэгээд хэсэг хугацааны дараа “Уучлаарай, таны нэр амийн номонд яаж ч хайгаад алга” гэж хариулах үед тэрээр галтай нууранд хаягдах болно.

Энэ галд хаягдахтай адил үйл явдал өнөөх араатнуудад мөн адил тохиолдсон. (11,12) Тэд эхлээд үнэхээр хөгжил дэвшилтэй сайхан үеүдтэй байсан. Гэхдээ эцэстээ үхэл рүүгээ явсан.

Дараагийн хоёр дахь Даниелыг тайвшируулсан зүйл нь Хүний Хүү шиг Нэгэн байсан. Одоо бүгдээрээ 13-р зүйлийг үзье. “Би шөнийн үзэгдлийг харсаар байсан бөгөөд, Харагтун, Хүний Хүү шиг Нэгэн тэнгэрийн үүлсийг хөлөглөн ирж, Тэрээр Эртний Нэгэнд очоод, Түүнд бараалхав.”

Есүс бол Бурханы цорын ганц Хүү, Эздийн Эзэн, Хаадын Хаан бөгөөд Өөрийгөө бүхнээс дорд болгож, төлөв даруугаар боол, үйлчлэгч мэт хүмүүс бидэнд үйлчилсэн. Хэдий Тэр Хаадын Хаан боловч энэ дэлхийн хаанчлалын хаадууд шиг бардам, ихэмсэг байгаагүй. Харин Тэр үнэхээр номхон дөлгөөн байсан. Тэр Бурханы Хүү боловч энэ дэлхийд байх хугацаандаа Өөрийгөө хэзээ ч дөвийлгөж, бардамнаж байгаагүй. Харин тэрээр хараагүйд хараа оруулж, ганцаардал гунигаар дүүрэн татвар хураагч Левиг өрөвдөн хайрлаж, зовж шаналан, орхигдсон хүмүүст тусалсаар байсан. Тэрээр бидний гэмийн төлөө загалмайд цовдлогдож, хатгагдаж үхээд, гурав дахь хоногтоо дахин амилснаар үхлийг ялан дийлсэн. Энэ Есүст бид итгэснээр Бурханы шүүлтийн өмнө зогсож, амийн номноос нэрээ олуулах боломжтой болсон. Энэ Есүсийн ноёрхол үүрдийн ноёрхол бөгөөд өнгөрөн одохгүй. Түүний хаанчлал нь устахгүй хаанчлал юм.

Гурав дахь Даниелыг амраасан зүйл нь Дээдийн Дээд Нэгэний ариун хүмүүст хаанчлал өгөгдсөн явдал юм. Гэхдээ 25 дугаар зүйл үзвэл нөгөөх жижигхэн эвэр Бурханы эсрэг ярьж, ариун хүмүүсийг дийлэх болно гэсэн. Гэхдээ энэ нь үүрдийн ялагдал бус, харин 3 жил хагасын буюу түр зуурын хугацаа юм. (Илч 11:2-3) Мэдээж зовлон гунигын энэ хугацаа бидний хувьд дэндүү урт удаан мэт санагдаж болно. Гэхдээ энэ зовлон дунд бидний баримтлах ёстой хандлага бол Илчлэл 13:10-д гарсан “Хэрэв хэн нэгэн нь баригдах тавилантай бол баригдана. Хэрэв хэн нэгэн нь илдээр алдаг бол тэр илдээр алуулах ёстой. Энд ариун хүмүүсийн тэвчээр, итгэл байна.” гэсэн үг юм. Энэ хүнд цагийг туулах нууц нь итгэгч бидний тэвчээр болон итгэл гэдгийг библи хэлж байна. Өнөөдөр бидний дунд ийнхүү зовлон бэрхшээлийг итгэл болон тэвчээр дотор туулж буй хүмүүс олон байгаа гэдэгт итгэж байна. Гэхдээ энэ бүхэн хугацаатай бөгөөд нэг л өдөр дуусах болно.

Одоо бүгдээрээ 27 дугаар зүйлийг хамт үзье. “Тэгээд бүхэл тэнгэрийн доорх хамаг хаанчлалын дээд засаг, эрх мэдэл болон агуу байдал нь Дээдийн Дээд Нэгэний ариун хүмүүсийн ард түмэнд өгөгдөх болно. Түүний хаанчлал нь үүрдийн хаанчлал байх бөгөөд бүх эрх мэдлүүд Түүнд үйлчилж, захирагдан дагах болно" гэв”

Эндээс бүх Христэд итгэгчид эцсийн цагт ялалтанд хүрч байгааг мэдэж болно. Бид антихристүүдийг Бурханы тусламжтайгаар ялан дийлэх болно. Бид тэнгэрийн хаанчлалд орж, Түүнтэй хамт хаанчлах болно.

Тэгээд өнөөдрийн Даниелын үзэгдэл нь энэ дэлхийд олон хаанчлал байх боловч бүгд өнгөрөн одох болно. Бас биднийг зовоох антихристүүд, адгийн муу ёрын сүнснүүд байх боловч эцэстээ үхлийн галд хаягдах болно. Харин Хүний Хүүд итгэгч нь эцсийн эцэст ялалт байгуулж, шүүлтийг даван, хаанчлалд орж, Түүнтэй хамт хаанчлах болно гэдгийг бидэнд зааж байна.

Тиймээс бид эдгээр араатнуудын аясаар амьдарч, даган баясч, тэдний нүд, сэтгэл булаам амьдралд хууртаж болохгүй. Харин хүн нэг бүрийг шүүх, Хүний Хүү, Ариун Эзэнд итгэн найдаж, үйлчилж амьдрах хэрэгтэй. Манай чуулган, Монгол улс, бүх дэлхийн хүмүүс итгэл ба тэвчээрээр дүүрэн итгэгчдээр дүүрч, үй олон байх болтугай хэмээн Эзэнээс хүсэн гуйж байна. Амен.